Arrincan os “restaurantes fugaces” no Centro Superior de Hostalaría de Galicia

Arrincan os “restaurantes fugaces” no Centro Superior de Hostalaría de Galicia

A formación práctica é un dos aspectos máis importantes na formación dos alumnos do Centro Superior de Hostalaría de Galicia, unha formación que para os alumnos de Certificado de Elaboración e Xestión en Cociña vai adoptar unha nova modalidade coa posta en marcha dos “restaurantes fugaces”.

Esta iniciativa, que foi presentada no CSHG por parte da súa directora e da directora de Turismo de Galicia, Marta Fernández e Nava Castro, respectivamente, permitirá que tras oito meses de formación no centro, alternando unha semana de teoría en Administración de Empresas con outra de prácticas en cociña, e despois de tres meses de prácticas en empresas, os alumnos desta certificación desenvolvan un proxecto de viabilidade empresarial no Restaurante á Carta do Centro Superior de Hostalaría de Galicia.

Organizados en catro grupos, os alumnos do Certificado de Cociña pon en marcha diferentes modelos de negocio de restauración que eles mesmos deseñaron previamente nunha aposta pola formación na que contará con mentores de luxo como Beatriz Sotelo, Pepe Solla, Héctor López e David Ortiz, que os guiarán no seu percorrido, con achegas e correccións ás súas propostas, e que participará con eles na degustación de arranque que se celebrará o luns de inicio de cada proxecto.

Asi, do 15 ao 19 de febreiro, estará en funcionamento o restaurante á carta O Bagazo, de estilo bistró, que conta coa colaboración de David Ortiz, no que un orixinal xogo de contrastes rescatará sabores tradicionais da gastronomía galega. Do 29 de febreiro ao 4 de marzo será a quenda de Tépic. Con Beatriz Sotelo como mentora, os alumnos desenvolverán unha cociña fusión mexicana e galega cunha oferta de menú degustación variable cada día e unha carta fixa. No mes de marzo -do 14 ao 18- o restaurante acollerá o proxecto Hemisferio, asesorado por Pepe Solla. Unha proposta gastronómica formada por diversas elaboracións internacionais nas que prima o produto galego. Por último, os alumnos do proxecto Azento Asiático, co asesoramento de Héctor López, ofrecerán desde o 28 de marzo ao 4 de abril, unha oferta de carta, menú degustación e take away baseada en produtos frescos e españois cun toque asiático.

Comparte...