Currimar: a paixón de 3 mulleres pola pesca sustentable e a tradición

Currimar: a paixón de 3 mulleres pola pesca sustentable e a tradición

María Mosquera Leal

Cando Neves Medina, Nuria Carreño e Pracer Rodríguez decidiron poñer en marcha Conservas Currimar en 2012, xa cumpriran 45 anos. Traballaban noutros sectores e residían fóra de Galicia, pero ao trasladarse a Burela por motivos persoais Neves e Nuria, vírono claro. As tres decidiron dar un gran paso adiante nas súas vidas, embarcándose nun proxecto que ademais buscaba apoiar a pesca sustentable, trasladando a mellor calidade e bo facer dos mariñeiros das costas da Mariña Lucense ao mercado. Converteron o que elas definen como “unha afección moi estendida nos fogares da comarca”, nunha fonte de ingresos. E conseguírono. Paso a paso, sen présa pero sen pausa, chegaron a mercados internacionais como o mexicano e a chamar a atención de afeccionados ás conservas de todo o país.

No seu obradoiro só entran pezas de Bonito do Norte duns 10 quilos comprados directamente na lonxa de Burela e pescados ao Curricán, un a un e con cana. Pezas que normalmente se usarían pola súa calidade en cociña e non para conservar, o que constitúe un aspecto diferencial clave con respecto á súa competencia. Todo como fan as mulleres da zona para as súas familias, respectando o produto e aplicando a todo o proceso moito agarimo.

Productos Currimar

O bonito prepárase en lombos en aceite de oliva, cunha maceración mínima de 20 meses, en escabeche, en salsa de tomate, en aceite de oliva ecolóxico e ao natural (con auga de mar depurada); tamén envasan o cocote, a ventresca, marmitako ou faragullas de bonito en aceite de oliva. En paralelo apostaron por traballar o polbo, que se comercializa cocido e envasado con aceite de oliva virxe extra, ou como base dun salpicón.

A elaboración artesanal, o empeño por apoiar unha pesca sustentable, tan necesaria para o correcto mantemento dos nosos recursos naturais, e o material de primeira calidade, son as claves desta conserveira liderada por mulleres. Un aspecto tamén destacable nun sector moi masculino, no que poucas conseguen chegar a postos directivos. Unha historia cun final feliz, no que tanto consumidores como emprendedoras saen gañando, e de paso o bonito de Burela chega a outros mercados con todo o sabor da verdadeira tradición da zona.

Comparte...